ಚೀನಾದಲ್ಲಿ ಭೀಕರ ವಿಮಾನ ದುರಂತ ಸಂಭವಿಸಿದ್ದು, 133 ಪ್ರಯಾಣಿಕರನ್ನು ಹೊತ್ತಿದ್ದ ವಿಮಾನ ಪತನವಾಗಿದೆ. ಚೀನಾದ ಗುಹಾಂಕ್ಷಿ ಪ್ರಾಂತ್ಯದ ವೂಜಾವೂ ನಗರದ ಹೊರವಲಯದಲ್ಲಿ ವಿಮಾನ ಪತನವಾಗಿದೆ. ಇದುವರೆಗೂ ಸಾವು-ನೋವುಗಳ ಬಗ್ಗೆ ಯಾವುದೇ ವರದಿಯಾಗಿಲ್ಲ.
ಬೀಜಿಂಗ್‌: ನೈರುತ್ಯ ಚೀನಾದಲ್ಲಿ ಭೀಕರ ವಿಮಾನ ದುರಂತ ಸಂಭವಿಸಿದ್ದು, 133 ಪ್ರಯಾಣಿಕರನ್ನು ಹೊತ್ತಿದ್ದ ಚೀನಾ ಇಸ್ಟರ್ನ್‌ ವಿಮಾನ ಪತನವಾಗಿದೆ. ವಿಮಾನ ಪತನದಿಂದ ಪರ್ವತದಲ್ಲಿ ಬೆಂಕಿ ಹೊತ್ತಿಕೊಂಡಿದ್ದು, ಸಾವು-ನೋವಿನ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ ಎಂದು ತಿಳಿದುಬಂದಿದೆ.
ಚೀನಾದ ಗುಹಾಂಕ್ಷಿ ಪ್ರಾಂತ್ಯದ ವೂಜಾವೂ ನಗರದ ಹೊರವಲಯದಲ್ಲಿ ಬೋಯಿಂಗ್‌ 737 ವಿಮಾನ ಪತನವಾಗಿದ್ದು, ಪರ್ವತದಲ್ಲಿ ಬೆಂಕಿಯ ಅವಘಡಕ್ಕೆ ಕಾರಣವಾಗಿದೆ ಎಂದು ಚೀನಾದ ಸಿಸಿಟಿವಿ ವರದಿ ಮಾಡಿದೆ. ಸದ್ಯ ಸ್ಥಳದಲ್ಲಿ ವಿಪತ್ತು ನಿರ್ವಹಣಾ ವಿಭಾಗದ ಅಧಿಕಾರಿಗಳು ಬೀಡುಬಿಟ್ಟಿದ್ದಾರೆ. ಈಗಾಗಲೇ, ರಕ್ಷಣಾ ತಂಡಗಳು ರಕ್ಷಣಾ ಕಾರ್ಯಾಚರಣೆಗೆ ಅವಘಡ ನಡೆದಿರುವ ಸ್ಥಳಕ್ಕೆ ತೆರಳುತ್ತಿವೆ.
ಚೀನಾ ಇಸ್ಟರ್ನ್‌ ವಿಮಾನ MU5735 ಕನ್ಮಿಂಗ್‌ ನಿಂದ ಗುಹಾಂಗ್‌ಜೂ ನಗರಕ್ಕೆ ತೆರಳುತ್ತಿತ್ತು. ಆದರೆ, ನಿಗದಿತ ಸಮಯಕ್ಕೆ ಗುಹಾಂಗ್‌ಜೂ ನಗರಕ್ಕೆ ವಿಮಾನ ತಲುಪಿಲ್ಲ ಎಂದು ವರದಿಗಳು ಹೇಳಿವೆ. ಮಧ್ಯಾಹ್ನ 1 ಗಂಟೆಗೆ ವಿಮಾನ ಪತನವಾಗಿರುವ ಬಗ್ಗೆ ಮಾಹಿತಿ ಲಭ್ಯವಾಗಿದೆ.
ಕರಾಚಿಯಲ್ಲಿ ಮತ್ತೊಂದು ವಿಮಾನ ತುರ್ತು ಲ್ಯಾಂಡಿಂಗ್‌!
ಇನ್ನು, ದಿಲ್ಲಿಯಿಂದ ದೋಹಾಗೆ ತೆರಳುತ್ತಿದ್ದ ಕತಾರ್‌ ಏರ್‌ವೇಸ್‌ ವಿಮಾನವನ್ನು ಪಾಕಿಸ್ತಾನದ ಕರಾಚಿಯಲ್ಲಿ ತುರ್ತು ಭೂಸ್ಪರ್ಶ ಮಾಡಲಾಗಿದೆ. ವಿಮಾನದ ಕಾರ್ಗೋ ವಿಭಾಗದಲ್ಲಿ ಹೊಗೆ ಕಾಣಿಸಿಕೊಂಡಿದ್ದರಿಂದ ಕರಾಚಿಯಲ್ಲಿ ವಿಮಾನವನ್ನು ಎಮರ್ಜೆನ್ಸಿ ಲ್ಯಾಂಡಿಂಗ್‌ ಮಾಡಲಾಗಿದೆ. QR579 ವಿಮಾನದಲ್ಲಿ 100 ಪ್ರಯಾಣಿಕರು ಇದ್ದರು.
ಇನ್ನು, ಪ್ರಯಾಣಿಕರಿಗೆ ಪರ್ಯಾಯ ವಿಮಾನವನ್ನು ವ್ಯವಸ್ಥೆ ಮಾಡಲಾಗಿದೆ ಎಂದು ಕತಾರ್‌ ಏರ್‌ಲೈನ್ಸ್‌ ತಿಳಿಸಿದೆ. ಕರಾಚಿಯಲ್ಲಿ ವಿಮಾನವು ಸುರಕ್ಷಿತವಾಗಿ ಭೂಸ್ಪರ್ಶ ಮಾಡಿದೆ. ಪ್ರಯಾಣಿಕರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದೆ. ಇನ್ನು, ಘಟನೆಯನ್ನು ತನಿಖೆಗೆ ಹೊಳಪಡಿಸಲಾಗುವುದು ಎಂದಿರುವ ಕತಾರ್‌ ಏರ್‌ಲೈನ್ಸ್‌, ಪ್ರಯಾಣಿಕರು ದೋಹಾಗೆ ತೆರಳಲು ಪರ್ಯಾಯ ವಿಮಾನವನ್ನು ವ್ಯವಸ್ಥೆ ಮಾಡಲಾಗಿದೆ. ಅದಲ್ಲದೇ ಈ ವಿಚಾರವಾಗಿ ಪ್ರಯಾಣಿಕರಿಗೆ ವಿಮಾನಯಾನ ಕಂಪನಿ ಕ್ಷಮೆ ಕೇಳಿದೆ.