ರಷ್ಯಾ ಮತ್ತು ಉಕ್ರೇನ್ ನಡುವಣ ಯುದ್ಧದ ಕಾವು ಏರುತ್ತಲೇ ಇದೆ. ಹೀಗಾಗಿ, ಜೀವ ಭಯದಲ್ಲಿ ಜನ ವಲಸೆ ಹೋಗುತ್ತಿದ್ದಾರೆ. ಭಾರತ ಕೂಡಾ ಉಕ್ರೇನ್‌ನಲ್ಲಿರುವ ವಿದ್ಯಾರ್ಥಿಗಳನ್ನು ತವರಿಗೆ ಕರೆತರುತ್ತಿದೆ. ಇತ್ತ, ರಷ್ಯಾದ ದಾಳಿಯಿಂದ ತಮ್ಮ ದೇಶವನ್ನು ರಕ್ಷಿಸಿಕೊಳ್ಳಲು ಉಕ್ರೇನ್ ಯೋಧರು ಶ್ರಮಿಸುತ್ತಿದ್ದಾರೆ. ನಾಗರಿಕರು ಕೂಡಾ ಇವರೊಂದಿಗೆ ಕೈಜೋಡಿಸಿದ್ದಾರೆ.
ವಾಯು ದಾಳಿಯ ಸೈರನ್, ಬಾಂಬ್ ಸ್ಫೋಟದ ಶಬ್ದ, ಕ್ಲಿಪಣಿ ದಾಳಿಯ ಭಯದಲ್ಲಿ ಉಕ್ರೇನಿನ ನಾಗರಿಕರು ನಲುಗಿ ಹೋಗಿದ್ದಾರೆ. ಈ ಯುದ್ಧದ ಹೃದಯ ವಿದ್ರಾವಕ ಸನ್ನಿವೇಶಗಳು ಈಗ ಸೋಶಿಯಲ್ ಮೀಡಿಯಾದಲ್ಲಿ ಕಾಣಸಿಗುತ್ತವೆ. ಈ ಎಲ್ಲಾ ದೃಶ್ಯಗಳು ಕರುಳು ಹಿಂಡಿದಂತೆ ಮಾಡುತ್ತವೆ. ಆದರೆ, ಈ ನೋವಿನ ನಡುವೆಯೂ ಒಂದಷ್ಟು ಹೃದಯಸ್ಪರ್ಶಿ ದೃಶ್ಯಗಳೂ ಆಗೊಮ್ಮೆ ಈಗೊಮ್ಮೆ ಕಾಣುತ್ತಿದೆ. ಸದ್ಯ ಅಂತಹ ಹೃದಯಸ್ಪರ್ಶಿ ದೃಶ್ಯಗಳ ಸಾಲಿಗೆ ಸೇರುವಂತಹ ವಿಡಿಯೋವೊಂದು ವೈರಲ್ ಆಗುತ್ತಿದೆ.
ಇದು ಉಕ್ರೇನ್ ಸೈನಿಕರೊಬ್ಬರು ಮಿಲಿಟರಿ ಚೆಕ್ ಪಾಯಿಂಟ್‌ನಲ್ಲಿಯೇ ತನ್ನ ಮನದನ್ನೆ ಎದುರು ವಿವಾಹ ಪ್ರಸ್ತಾಪ ಮಾಡಿರುವ ಅಪೂರ್ವ ದೃಶ್ಯ. ದೇಶ ಸೇವೆಯಲ್ಲಿ ತೊಡಗಿದ್ದಾಗಲೇ ಈ ಸೈನಿಕ ಪ್ರಿಯತಮೆಯ ಎದುರು ವಿವಾಹ ಪ್ರಸ್ತಾಪ ಮಾಡುತ್ತಾರೆ. ಈ ಮೂಲಕ ಆಕೆಯೆ ಧೈರ್ಯ ತುಂಬುತ್ತಾರೆ. ಈ ಅಪೂರ್ವ ಕ್ಷಣಕ್ಕೆ ಅಲ್ಲಿದ್ದವರು ಸಾಕ್ಷಿಯಾಗುತ್ತಾರೆ.
ಉಕ್ರೇನ್ ಸೈನಿಕರ ಗುಂಪು ಮಿಲಿಟರಿ ಚೆಕ್ ಪಾಯಿಂಟ್‌ನಲ್ಲಿ ಕಾರನ್ನು ನಿಲ್ಲಿಸಿ ನಾಗರಿಕರನ್ನು ತಪಾಸಣೆ ಮಾಡುವ ದೃಶ್ಯದ ಮೂಲಕ ಈ ಕ್ಲಿಪ್ ಶುರುವಾಗುತ್ತದೆ. ನಾಗರಿಕರು ಕಾರಿಗೆ ಮುಖ ಮಾಡಿ ನಿಂತಿದ್ದಾಗ ಸೈನಿಕರು ಇವರನ್ನು ತಪಾಸಣೆ ಮಾಡುತ್ತಾರೆ. ಹೀಗೆ ತಪಾಸಣೆ ಮಾಡುತ್ತಿದ್ದಾಗ ಒಬ್ಬರು ಸೈನಿಕರು ಮೊಣಕಾಲಿನಲ್ಲಿ ಕುಳಿತು ಯುವತಿಯ ಎದುರು ವಿವಾಹ ಪ್ರಸ್ತಾಪವಿಟ್ಟಿದ್ದರು. ಈ ಅಚ್ಚರಿಯ ಕ್ಷಣದಲ್ಲಿ ಯುವತಿ ಭಾವುಕರಾಗಿದ್ದರು. ಜತೆಗೆ, ತನ್ನ ಬಾಳ ಸಂಗಾತಿಯನ್ನು ಬಿಗಿದಪ್ಪಿಕೊಂಡು ಪ್ರೀತಿ ತೋರಿದ್ದರು. ಸಂಕಷ್ಟದ ಸಂದರ್ಭದಲ್ಲಿ ಕಾಣಸಿಕ್ಕ ಈ ಹೃದಯಸ್ಪರ್ಶಿ ದೃಶ್ಯ ಅಲ್ಲಿದ್ದವರ ಕಣ್ಣಾಲಿಗಳು ತುಂಬಿ ಬರುವಂತೆ ಮಾಡಿತ್ತು.
ಸಹಜವಾಗಿಯೇ ಈ ವಿಡಿಯೋ ಈಗ ಎಲ್ಲರ ಹೃದಯ ಗೆದ್ದಿದೆ. ಎಲ್ಲರೂ ಬಲು ಆನಂದದಿಂದಲೇ ಈ ದೃಶ್ಯವನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ. ಎಲ್ಲರಲ್ಲೂ ಮಂದಹಾಸ ಮೂಡಿಸುವಲ್ಲಿ ಈ ಅಪೂರ್ವ ದೃಶ್ಯ ಯಶಸ್ವಿಯಾಗಿದೆ. ಹೀಗಾಗಿ, ಈ ವಿಡಿಯೋ ಸಾಕಷ್ಟು ವೀಕ್ಷಣೆ ಮತ್ತು ಮೆಚ್ಚುಗೆಯ ಪ್ರತಿಕ್ರಿಯೆಯನ್ನೂ ಗಳಿಸಿದೆ. ಈ ವಿವಾಹ ಪ್ರಸ್ತಾಪಕ್ಕೆ ಎಲ್ಲರೂ ಖುಷಿ ವ್ಯಕ್ತಪಡಿಸಿದ್ದಾರೆ.