ಬರೀ ಒಂದು ತಿಂಗಳ ಹಿಂದೆಯಷ್ಟೇ ದಿಯುನಲ್ಲಿ ಸಾಹಸಯಾನದಲ್ಲಿ ತೊಡಗಿದ್ದ ಗುಜರಾತಿನ ದಂಪತಿ ಬೆಚ್ಚಿಬೀಳುವ ಸನ್ನಿವೇಶವನ್ನ ಅನುಭವಿಸಿದ್ದರು. ನಾಗೋವಾ ಬೀಚ್‌ನಲ್ಲಿ ಖುಷಿಯಿಂದ ಪ್ಯಾರಾಸೈಲಿಂಗ್ ಮಾಡುವಾಗ ಎತ್ತರಕ್ಕೆ ಸಾಗುತ್ತಿದ್ದಂತೆಯೇ ಹಗ್ಗ ತುಂಡಾಗಿ ಇವರು ಸಮುದ್ರಕ್ಕೆ ಬಿದ್ದಿದ್ದರು. ಕ್ಯಾಮೆರಾದಲ್ಲಿ ಸೆರೆಯಾಗಿದ್ದ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿತ್ತು. ಇದೀಗ ಇದೇ ಸನ್ನಿವೇಶವನ್ನು ನೆನಪಿಸುವಂತಹ ಘಟನೆಯೊಂದು ನಡೆದಿದೆ.
ಸ್ನೇಹಿತರು ಕುಟುಂಬದವರೊಂದಿಗೆ ವಿಹಾರಕ್ಕೆಂದು ಹೋದಾಗ ಸಾಹಸ ಕ್ರೀಡೆಯಲ್ಲಿ ಪಾಲ್ಗೊಳ್ಳುವ ಸಂತೋಷವೇ ಬೇರೆ. ಇದು ಅದ್ಭುತ ಅನುಭವವನ್ನು ಕೊಡುತ್ತದೆ. ಆದರೆ, ಒಮ್ಮೊಮ್ಮೆ ಸುರಕ್ಷತಾ ಕ್ರಮಗಳ ನಿರ್ಲಕ್ಷ್ಯದಿಂದ ಈ ಖುಷಿಯ ಕ್ಷಣವೇ ಭಯಾನಕವಾಗಿ ಬದಲಾಗುತ್ತದೆ. ಇದು ಕೂಡಾ ಅಂತಹದ್ದೇ ಒಂದು ಘಟನೆ. ಮುಂಬೈನ ಸಾಕಿನಾಕದ ಕುಟುಂಬವೊಂದು ಅನುಭವಿಸಿದ ಆಘಾತಕಾರಿ ಕ್ಷಣ ಇದು.
ಇಬ್ಬರು ಮಹಿಳೆಯರು ಪ್ಯಾರಾ ಸೈಲಿಂಗ್‌ನಲ್ಲಿ ತೊಡಗಿರುವ ದೃಶ್ಯದ ಮೂಲಕ ಈ ಕ್ಲಿಪ್ ಶುರುವಾಗುತ್ತದೆ. ಇಬ್ಬರೂ ಖುಷಿಯಾಗಿ ತಮ್ಮ ಸಾಹಸಯಾನ ಮಾಡುತ್ತಾರೆ. ಆದರೆ, ಒಂದು ಹಂತದಲ್ಲಿ ದೋಣಿಗೆ ಕಟ್ಟಿದ್ದ ಹಗ್ಗ ತುಂಡಾಗುತ್ತದೆ. ಪರಿಣಾಮ, ಪ್ಯಾರಾಸೈಲಿಂಗ್ ಖುಷಿ ಅನುಭವಿಸುತ್ತಿದ್ದ ಈ ಇಬ್ಬರು ಸುಮಾರು 100 ಮೀಟರ್ ಎತ್ತರದಿಂದ ಸಮುದ್ರಕ್ಕೆ ಬಿದ್ದಿದ್ದರು. ಅದೃಷ್ಟವಶಾತ್, ಅವರು ಲೈಫ್ ಜಾಕೆಟ್‌ಗಳನ್ನು ಧರಿಸಿದ್ದರು. ಹೀಗಾಗಿ, ತಕ್ಷಣ ದೋಣಿಯಲ್ಲಿದ್ದವರು ಈ ಮಹಿಳೆಯರನ್ನು ರಕ್ಷಣೆ ಮಾಡಿದ್ದಾರೆ. ಅಲ್ಲಿಗೆ ಎಲ್ಲರೂ ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದರು.
ಸದ್ಯ ಈ ಆಘಾತಕಾರಿ ದೃಶ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಜತೆಗೆ, ಇಂತಹ ಸಾಹಸ ಕ್ರೀಡಾ ನಿರ್ವಾಹಕರು ಅನುಸರಿಸುವ ಸುರಕ್ಷತಾ ಕಾರ್ಯವಿಧಾನದ ಬಗ್ಗೆಯೂ ಚರ್ಚೆ ಕೂಡಾ ಹುಟ್ಟಿದೆ. ನಿಮಗೆ ಕೂಡಾ ಈ ಭಯಾನಕ ದೃಶ್ಯ ಆಘಾತ ತಂದಿರುವುದಂತು ಸತ್ಯ.