ಮೀನಿನ ಮೇಲೆ ದಾಳಿಗೈದ ಮೊಸಳೆಗೆ `ಶಾಕ್’: ಪ್ರಾಣವನ್ನೇ ತೆಗೆಯಿತು ಈಲ್‌ನ 860 ವೋಲ್ಟ್‌ `ಪವರ್’!

ನಮ್ಮ ಪ್ರಕೃತಿಯೇ ರಹಸ್ಯದ ಮೂಟೆ. ಅಲ್ಲಿ ಅಗಣಿತ ವಿಶೇಷ ಸಂಗತಿಗಳು ಕಾಣಸಿಗುತ್ತವೆ. ಕುತೂಹಲದಿಂದ ನೋಡಿದರೆ ಕ್ಷಣಕ್ಕೊಂದು ಅಪರೂಪದ ದೃಶ್ಯಗಳು ನಮ್ಮ ಪ್ರಕೃತಿಯಲ್ಲಿ ಗೋಚರಿಸುತ್ತದೆ. ಇವುಗಳಲ್ಲಿ ಕೆಲವೊಂದು ದೃಶ್ಯಗಳು ನಮ್ಮ ಊಹೆಗೂ ನಿಲುಕುವುದಿಲ್ಲ. ಹೀಗೆ ನಮ್ಮನ್ನು ಅರೆಕ್ಷಣದಲ್ಲಿ ಚಕಿತಗೊಳಿಸುವಂತಹ ಸಾಕಷ್ಟು ದೃಶ್ಯಗಳನ್ನು ನೀವು ಹಲವು ಸಲ ಸೋಶಿಯಲ್ ಮೀಡಿಯಾದಲ್ಲಿ ನೋಡಿರಬಹುದು. ಇಂತಹ ದೃಶ್ಯಗಳನ್ನು ಕಂಡಾಗ ಒಂದು ಕ್ಷಣ ನಮ್ಮ ಕಣ್ಣನ್ನೇ ನಮಗೆ ನಂಬಲಾಗುವುದಿಲ್ಲ. ಇದೀಗ, ಇಂತಹದ್ದೇ ಅಚ್ಚರಿಯ ವಿಡಿಯೋವೊಂದು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ.

ಇದು ಮೊಸಳೆಯೊಂದು ಮೀನಿನ ಕಾರಣದಿಂದ ಪ್ರಾಣ ಕಳೆದುಕೊಂಡ ದೃಶ್ಯ. ಮತ್ಸ್ಯವೊಂದು ತನ್ನೊಳಗಿನ ವಿದ್ಯುತ್ ಪ್ರವಹಿಸಿ ಈ ಮೊಸಳೆಯನ್ನೇ ಕೊಂದಿದೆ. ಆದರೆ, ಮೊಸಳೆ ಜತೆ ಈ ಮೀನು ಕೂಡಾ ಪ್ರಾಣ ಬಿಟ್ಟಿದೆ. ಸದ್ಯ ಈ ವಿಡಿಯೋ ಎಲ್ಲರಲ್ಲೂ ಅಚ್ಚರಿ ಮೂಡಿಸಿದೆ. ಆಹಾರ ಹುಡುಕಿಕೊಂಡು ದಡ ದತ್ತ ಈಲ್ ಎಂಬ ಮೀನು ಬರುತ್ತಿರುವ ದೃಶ್ಯದ ಮೂಲಕ 2.01 ನಿಮಿಷದ ಈ ವಿಡಿಯೋ ಕ್ಲಿಪ್ ಶುರುವಾಗುತ್ತದೆ. ಈ ಮೀನಿನ ಪಕ್ಕದಲ್ಲಿಯೇ ಮೊಸಳೆಯ ಕೂಡಾ ಹೊಂಚು ಹಾಕಿ ಕುಳಿತಿರುತ್ತದೆ. ಒಂದು ಹಂತದಲ್ಲಿ ಸರಿಯಾದ ಸಮಯ ನೋಡಿ ಈ ಮೊಸಳೆ ಈಲ್ ಮೇಲೆ ದಾಳಿ ಮಾಡುತ್ತದೆ. ಆದರೆ, ಇದೇ ಈ ಮೊಸಳೆ ಬದುಕಿದ್ದ ಕಡೆಯ ಕ್ಷಣವಾಗಿತ್ತು. ಯಾಕೆಂದರೆ, ಈಲ್ ಪ್ರವಹಿಸಿದ್ದ 860 ವೋಲ್ಟ್ ವಿದ್ಯುತ್‌ನಿಂದ ಮೊಸಳೆ ಕ್ಷಣಾರ್ಧದಲ್ಲಿ ಜೀವ ಬಿಟ್ಟಿತ್ತು. ಆದರೆ, ಮೊಸಳೆಯ ದವಡೆಯಲ್ಲಿ ಸಿಕ್ಕಿಬಿದ್ದಿದ್ದ ಈಲ್ ಕೂಡಾ ಬದುಕಲಿಲ್ಲ. ಇದು ಕೂಡಾ ಪ್ರಾಣ ಬಿಟ್ಟಿತ್ತು. `ಮೊಸಳೆ ಈಲ್ ಎಂಬ ಮೀನನ್ನು ತನ್ನ ಬಾಯಿಯೊಳಗೆ ಹಾಕಿಕೊಂಡಿದೆ. ಆದರೆ, ಈಲ್ 860 ವೋಲ್ಟ್ ವಿದ್ಯುತ್ ಉತ್ಪಾದಿಸುತ್ತದೆ. ಹೀಗಾಗಿ, ಶಾಕ್‌ನಿಂದ ಮೊಸಳೆ ದವಡೆ ತೆರೆಯದೆಯೇ ಸಾವನ್ನಪ್ಪುತ್ತದೆ. ಮೊಸಳೆಯ ದವಡೆಗೆ ಸಿಲುಕಿ ಈಲ್‌ ಕೂಡಾ ಜೀವ ಕಳೆದುಕೊಳ್ಳುತ್ತದೆ’ ಎಂದು ಕ್ಯಾಪ್ಶನ್‌ನಲ್ಲಿ ಉಲ್ಲೇಖಿಸಲಾಗಿದೆ.

WhatsApp
Facebook
Telegram
error: Content is protected !!
Scroll to Top